Saisonbricht Herren 2: Achterbahnfahrt, Ligaerhalt und en emotionale Abschied

Eusi erschti Saison i de 3. Liga isch verbii – und was für e Achterbahnfahrt das gsi isch! Als frischbachene Ufstiiger isch s Ziel vo Aafang a klar gsi: I de neue Liga aachoo, zeige dass mer da aneghöred und de Klassenerhalt sichere.

Starchi Hinrundi, Durststrecki und es Happy End

Mir sind richtig guet id Saison gstartet. D Motivation isch höch gsi und mir hend i de Hinrundi chönne wichtigi Pünkt sammle, under anderem mit emene umkämpfte 3:1 Sieg zum Uftakt gege Frick. Aber wie das halt mängmal so isch: I de Rückrundi isch plötzlich de Wurm dinne gsi. S isch fascht gar nüüt meh gloffe und mir hend es paar bitteri Niderlage müesse isstecke. Es hät e churzi Ziit bruucht, bis mir eus us dem Loch usekämpft hend. Zum Glück hemmer eus zum Schluss nomal gfasst: Mit zwei souveräne 3:0 Sieg gäge Lengnau und Dottike i de letschte Mätch hemmer d Saison ufem 6. Platz (vo 10 Teams) chönne abschlüsse. Ligaerhalt: Check!

Cup-Fieber und Seismograph-Agriff

Au im Aargauer Cup hemmer eusi Spure hinderlah. Dete hemmer en richtige Exploit gha und Zelgli imene geile Match mit 3:1 usegworfe. Dur das hemmer eus s Ticket für di nöchschti Rundi gäge BTV Aarau 2. Liga Team gholt! Dete isch dänn leider mit eme 1:3 Endstation gsi, aber mir hend definitiv zeigt, was in eus gsteckt. Und au näbed em Fäld ischs eus nie langwiilig worde – vo Fahrgmeinschafte wo sich eifach mal verfahred (meisten hets mitem Imran z tue gha 😇), bis hi zu geniale Videostudie wommer igfüehrt hend, wommer plötzlich paar ganz skurrili Moment i eusne Spiel gseht. Nöchst Saison schaffemer eus no en Seismograph zue, dass wenn de Nicci de Ball widermal abepäätzt chönd luege, wos es Erdbebe usglöst het.

Danke für alles, Bryan! ❤️

Jetzt aber zum wichtigschte Teil vo dem Bricht. Endi Saison het eus euse TRainer der Bryan mitteilt, dass er de Verein nach über 10 Jahr als Spieler etlichii Jahr als Trainer wird verlah.

Bryan, was du für s Herre 2 gleischtet häsch, isch eifach unglaublich. Du häsch eus ganz am Aafang i de Easy League überno und dänn Schritt für Schritt ufbout. Zerscht de Wechsel id 5. Liga, dänn de Ufstiig i d 4. Liga und letscht Saison sogar de grandiosi Sprung i d 3. Liga. Und jetzt hemmer gmeinsam de Ligaerhalt gschafft. Mir wend dir vo ganzem Herze danke säge. Danke für alles, was du eus bibracht häsch. Danke für dini Geduld, dis Herzbluet und defür, dass du eus als Team so unfassbar guet zämegschweisst häsch. All die tolle und unvergässliche Moment mit dir uf und näbem Fäld werded mir für immer in Erinnerig bhalte. Du häsch s Herre 2 zu dem gmacht, was es hüt isch, danke!

En riese Dank gaht zudem au a eusi wunderbare Fans und Mitmänsche, wo en riese Teil bitreit hend, dass mier de Ligaerhalt gschaffet hend. Und a alli helfende Händ, ohni die s Volleymall nöd wür existiere. WEg dem Danke au allne Schiiris, Schrieber und eusem Trikotsponsor (Scheuber IT). Mir gsehnd eus nöchscht Saison!

Hopp Mutsch und TEAM, VIIVAA! 🎉🏐